Guktie hööptedh?

Maahtah vædtsoesvoete- jïh seksuaalemeadtoeh hööptedh jis pollisese jallh maanavaarjelæmman bïeljelh, jallh viehkehth dam mij dagkerh meadtoeh dååjroe seekerevoetese båetedh, vuesiehtimmien gaavhtan aehpiejarngese, skïemtjegåatan jallh jeatjah jearsoe sæjjan. Vædtsoehvoetesne geerve almetji gaskem lea vihkele vuarjasjidh mejtie maanah aaj leah dam dååjreme.

Dahkoealternatijvh

Jearohke tsiehkien itjmiesvoeteste jïh man fuehpie lea dïsse mij dam dååjroe, sïjhth jienebh dahkoealternatijvh utnedh. Vihkele datne leah jearsoe dïhte maam datne darjoeh lea sjiehteles hööptedh.

Jis jielede jïh healsoe leah vaahresne, tjoerh maam joem varke darjodh. Jis gåarede, vïhtesjh, gihtjh jïh goltelh dam man bïjre lea, jïh laavenjostede jearsoe raerieh gaavnedh. Edtjh vædtsoehvoetem jallh daaresjimmieh tjöödtjestidh mah dorjesuvvieh, jallh vaahra vædtsoesvoete jallh daaresjimmie maahta sjugniehtovvedh varke, maahta ellen bööremes jïh radtjoesommes årrodh pollisem gaskesadtedh.

Jeatjah alternatijvh vuarjasjidh goh pollisese bïeljelidh, lea joekoen sjyöhtehke gosse vïenhth pollisine gaskesadtedh ij nuekie varke reaksjovnem vedtieh. Maahta aaj sjyöhtehke årrodh gosse dïhte mij dagkerh meadtoeh dååjroe, ij sïjhth datne edtjh pollisese bïeljelidh, men maahta dam seekerevoetese viehkiehtidh jeatjahlaakan.

Mujhtieh aaj vuarjasjidh maam maahtah darjodh juktie gorredidh. jïh dagke aaj vaarjelidh dam man bïjre lea, goske jeatjah viehkie lea tseegkesovveme.

Årroeh eensi jïh tjyölkehke

Gosse hööptemedïedtem nuhtjeme, dellie vihkele laavenjostedh dejnie man bïjre lea – seamma mejtie lea maana jallh geerve almetje.

Vïhtesjh jïh goltelh dam mestie tjoeperdh. Jis gåarede, seamadidie dan bïjre maam guhkiebasse soptsesth jïh gïese, guktie jïh gåessie, jïh soejkesjidie ektesne guktie hööpteme edtja sjugniehtovvedh. Jis datne fer snååhpehke, sååjhtoe offere bïlleje, ij sïjhth dan bïjre soptsestidh jallh jeahta ij leah saatnan maam lea aarebi soptsestamme. Vihkele leajhtadimmiem utniehtidh.

Årroeh tjyölkehke jïh eensi. Soptsesth man åvteste datne tjoeperdh, jïh dov lea dïedte bïeljelidh gosse åådtjeme maam akt daejredh mestie bïllh mij akt itjmies maahta sjugniehtovvedh. Soptsesth dagkerh tsiehkine tjuara voestegh jieledem jïh healsoem krööhkestidh, jïh dïedte lea faamosne jalhts dïhte ij sïjhth datne bïeljelh. Jis dov lea barkoe jïh sjaevehtsvoetedïedtem åtnah, tjïelkesth hööptemedïedte lea faamosne jalhts dov lea sjaevehtsvoetedïedte.

Jis idie sïemes sjïdth, mujhtieh læjhkan bievnedh maam darjoeh, jïh mij vielie sjugniehtåvva aamhtesisnie. Aellieh vielie bïevnesh sjaevehtsvoetedïedtine mubpiejgujmie juekieh, goh dïhte mij lea daerpies juktie hööptedh.

Gaskesadteme vihkele

Såemies aejkien tsiehkie kreava datne maam joem varke darjoeh, såemies aejkien lea iemie dejnie soptsestidh man bïjre lea, jïh vielie bïevnesh reebledh åvtelen pollisem gaskesadth jallh jeatjahlaakan hööpth.

Maahta haestije årrodh joekehts tsiehkieh sinsitnien vööste vïekesjidh. Maam sïjhth darjodh sæjhta jearohke årrodh man praaretje tsiehkie lea, man itjmies lea, jïh aaltere jïh man geerve almetje lea. Jis gåarede, soptsesth dejnie jïh goltelh dïsse man bïjre lea. Voejhkelh dan gåhkese gåarede hijven jïh jearsoe raerieh ektesne gaavnedh.

Leajhtedh jïjtjemdh

Maahta haestije årrodh vuarjasjidh man stoerre nuepie lea naakede sæjhta sjugniehtovvedh, jïh man praaretje jïh vaarege tsiehkie lea. Jis datne maahtah gaskesem dassedh dejnie mij dutnjien beavneme jïh ih vielie dan leajhtadimmiem utnieh, jis altese væljoen vööste bïeljelh, dellie gaajhke maahta geervebe sjïdtedh. Mubpene bielesne sååjhtoe dïhte buerebe domtoe gosse datne dïedtem vaaltah bïeljelidh. Bïeljelidh ij daarpesjh årrodh datne leajhtadimmiem tsööpkh.

Ij leah aelhkie joekoen itjmies tsiehkiej gaskem vïekesjidh, men gosse daerpies, tjoerh jïjtjedh vuarjasjæmman leajhtadidh jïh maam joem darjodh. Pryövh dan hijvenlaakan maahtah viehkiehtidh, ohtsh raerieh, leajhtedh jïjtjedh jïermijesvoetese jïh guktie jïjtje aamhtesem vuarjesjh.

– Bïeljelimmie ij daarpesjh leajhtadimmiem tsööpkedh

Jeenjesh dååjroeh pollisem jallh jeatjah åejvieladtjh bieljelidh lea gïerve, dan åvteste bælla leajhtadimmiem tsööpkie maam åådtjeme. Ij daarpesjh heannadidh, professovre Kjartan Leer-Salvesen jeahta, gie leajhtadæmman jïh bïeljelæmman dotkeme.

Lohkh vielie

– Numhtie tjuara årrodh

Hööptemedïedte sæjhta jiehtedh veeljemh mejtie maahta gïerve årrodh vaeltedh, aaj faagealmetjidie goh dåakterh jïh lohkehtæjjah.

Lohkh vielie