– Almetjh deejrin mij akt lij båajhtode
Luhkie jaepieh Marius Bråtelund dååjri altese aehtjie seksuelle daaresjimmieh sov vööste darjoeji. Dan mænngan lea guarkeme dovne kraannah jïh dåakterh lin guarkeme «mij akt» lij båajhtode.
Marius lij govhten jaepien båeries gosse aehtjebe satnem voestes aejkien raantan veelti seksuellelaakan. Daaresjimmieh jåerhkiejin goske lij 16 jaepien båeries. Skaamoen gaavhtan idtji gåessie gih naakenidie soptsesth dan bïjre mij sjugniehtovvi, men dovne kraannah jïh maanadåaktere riektesne tjïelkestin dah lin væhtah vuajneme mij akt lij båajhtode. Dah veeljin sov tjoeperdimmiem ij giesie akt soptsestidh, ij pollisese jallh maanavaarjelæmman.
– Almetjh leah daajreme mij akt sjugniehtovvi. Joekoen skuvlesne. Mov lij stoerre gaatoe, jïh im lim eadtjohke tæjmojne. Kraannah lin jïjnjem tjearoem jïh tjarke tjoejh govleme, guktie daajram almetjh deejrin mij akt sjugniehtovvi, Marius Bråtelund soptseste.
Hööptemedïedten gaavhtan maahta bysvedh jis ij pryövh daaresjimmieh hööptedh mejtie Marius Bråtelund dååjri – men vaenie dïedten bïjre daejrieh.
Daelie Marius bïjre jarkan mïnnede jïh lohkehte, jïh soptseste dovne sov dååjresi bïjre jïh guktie satne systeemem dååjri gosse minngemes viehkiem åadtjoeji 16 jaepien båeries. Dan mïelen mietie lea fer vaenie daajroe dej luvnie mah maanajgujmie jïh noerigujmie berkieh, dej signaali bïjre mejtie daah maanah jïh noerh olkese seedtieh. Dan åvteste gæmhpoeminie stuerebe fokusem dïsse ööhpehtimmesne åadtjodh, dovne lohkehtæjjide, sosionovmide jïh maana- jïh noerebarkijidie.
–Mov maanadåaktere, mij dovne plaave mïerhkh jïh jeatjah fysiske væhtah vuajneme, veelji ij dan bïjre bïeljelidh. Tuhtjem dïhte joekoen passijve, gosse dåakterem åtna mij ij dam dïedtem vaeltieh maam lea stillesovveme vaeltedh dagkeres barkosne. Tuhtjem ov-murreds. Guarkam daate ij leah aelhkie, men tjuara buerebe årrodh aktem fer jïjnjem tjoeperdimmiebïevnesem seedtedh goh akte fer vaenie, Bråtelund jeahta.
Onterdh mejtie dov lea hööptemedïedte?
Daesnie vïjhte gyhtjelassh mah maehtieh viehkine årrodh.
Hööptemedïedte lea faamosne gaskem jeatjah tsiehkine gusnie vaahra naaken naakenem raantan vaalta, naakenem buvvie, daaresje lïhke ektiedimmine jallh seksuelle daaresjimmieh maanaj vööste dorje. Daate lea dahkoeh mah bysvehtslaaken paragraafen 196 nualan båetieh.
Såemies aejkien dam seekerelaakan daajrah, jeatjah aejkien dov lea nåake sovme. Nuekie datne vïenhth daate seapan sååjhtoe heannadidh. Dellie dov lea hööptemedïedte. Dov aaj hööptemedïedte jis vïenhth lea vaahra dahkoe sæjhta mubpesth sjugniehtovvedh.
Jis buektehth, pryövh heerredidh dahkoe sjugniehtåvva. Jis dahkoe joe lea sjugniehtovveme, dov lea dïedte skaarah jïh jeatjah konsekvensh destie heerredidh.
Dov ij leah hööptemedïedte jis dïhte jieledem jïh healsoem vaahrese beaja.
Ij guhte dïedtem utnieh jïjtjemse jallh naan ov-såahtan almetjh baajedh bïedtehtovvedh jallh sikteme sjïdtedh. Dellie tjoerh pryövedh dam jeatjahlaakan heerredidh goh pollisese bïeljelidh. VUEPTESTH daate ij leah faamosne jis offere lea unnebejaepien, jïh dïhte mij baaja årrodh hööptedh hoksedïedtem maanan åvteste åtna.
Jis vaestiedasse daejtie gyhtjelasside lea «Jaavoe», dov lea dïedte pollisese bïeljelidh jallh jeatjahlaakan pryövedh hööptedh olles dahkoe sjugniehtovvh. Mujhtieh hööptemedïedte iktesth sjaevehtsvoetedïedten åvtelen båata, jis dov lea.
Lij maahteme iemie byjjenimmiem åadtjodh
Bråtelund veanhta hööptemedïedte lea mij akt mij byöroe vihkeles dïrreginie årrodh dejtie gïeh almetjigujmie barkeminie, jïh mah dagke daaresjimmieh dååjreme.
–Daate lea mij akt man bïjre byöroe ööhpehtidh dejtie mah edtjieh maanajgujmie jïh noerigujmie barkedh. Vihkele eantan stuerebe fokusem åadtjodh daej teemaj bïjre studiji sïjse. Joekoen jeenjesh mah eah daejrieh guktie edtja signaalide vueptiestidh mejtie daah maanah jïh noerh vedtieh. Aaj vihkele lïeredh guktie maahta leajhtadimmiem dejtie tseegkedh mah leah daaresjimmieh dååjreme, jeahta.
–Såemies raejkieh seabradahken gïetedimmievuekesne, jïh dellie hööptemedïedte lea mij akt man bïjre almetjh byöroeh daejredh Jeenjesh maehtieh jïjnjh vaejvieh slyöhpedh jis jienebh leah dan bïjre bïeljelamme maam daejrieh, jeahta. Jis naakenh lin bïeljelamme, Bråtelund veanhta satne lij maahteme gellie jaepieh slyöhpedh daaresjimmiejgujmie. Dellie lij maahteme jeatjah jieledem åadtjodh goh daan biejjien åtna.
– Jis naakenh lin doesteme bïeljelidh, dellie lim verkebe båateme dehtie byjjenimmeste maam utnim, jïh dagke vielie iemie maana- jïh noerebaeliem åådtjeme. Dellie lim maahteme gellie minngieskaarah jïh traavmatihkeles mojhtesh slyöhpedh, jeahta.