Plikt.no birra

Našuvnnalaš máhttoguovddáš veahkaválddi ja traumáhtalaš streassa birra (NKVTS) lea dinutvei.no bokte ráhkadan plikt.no Justiisa- ja gearggusvuođadepartemeantta gohččuma mielde.

Neahttasiiddu ulbmil lea lasihit dihtomielalašvuođa hehttengeatnegasvuođa birra veahkaválddálaš- ja seksuálaláhkarihkkumiid oktavuođas. Plikt.no almmuhuvvui 2019:s ja lea oassi doaibmabidjopáhkas mii gullá doaibmaplánii veahkaválddi vuostá lagas oktavuođain (2014–2017), Et liv uten vold.

Jagi 2026 plikt.no almmuhuvvui ođđasit ođđa hámiin. Ulbmilin lei álkidahttit neahttasiiddu geavaheami ja dieđuid gávdnama siiddus.

• Našuvnnalaš máhttoguovddáš veahkaválddi ja traumáhtalaš streassa birra
• Dinutvei.no Našuvnnalaš ofelaš veahkaválddi ja illastemiid oktavuođas

Geatnegasvuohta hehttet veahkaválddi dahje illasteami

Mis lea buohkain geatnegasvuohta geahččalit hehttet ahte muhtun gillá duođalaš rihkolaš daguid, dakkár daguid mat sáhttet čuohcat heggii ja dearvvašvuhtii. Hehttengeatnegasvuohta gusto buohkaide, sihke ámmátolbmuide geain lea jávohisvuođageasku, ja priváhtaolbmuide.

Hehttengeatnegasvuođa birra eai dieđe nu oallugat. Mánáid-, nuoraid- ja bearašdirektoráhta jagi 2018 čađahan guorahallan čájeha ahte 74 proseantta mis eai leat gullan ge dan birra. Dušše okta logi bargis dearvvašvuođadoaimmahagain, skuvllain, mánáidgárddiin, skuvlaastoáiggeortnegiin (SAÁO) dahje friddjaáiggeservviin diehtá hehttengeatnegasvuođa birra ja maid dat mielddisbuktá.

Hehttengeatnegasvuohta lea erenoamážit áigeguovdil ámmátjoavkkuide mat deaivvadit olbmuiguin iežaset bargguin ja sáhttet gártat dakkár diliide gos fertejit árvvoštallat lea go sis geatnegasvuohta geahččalit hehttet illasteami dahje roavva veahkaválddi. Go olbmot dihtet nu unnán hehttengeatnegasvuođa birra dahje iešguđet ládje dulkojit dahje praktiserejit dan, de dat sáhttá vearrámus dáhpáhusas dagahit ahte veahkaválddi ja illastemiid gillájeaddjit eai oaččo dárbbašlaš veahki áiggil. Dat sáhttá maid dagahit váttisvuođaid iešguđetlágan fágaolbmuid ja ámmátjoavkkuid ovttasbargui.

Plikt.no:s gávnnat dieđuid hehttengeatnegasvuođa birra ja movt sáhtát hehttet ovttas suinna geasa dat guoská. Gávnnat maid listtu veahkaválddálaš- ja seksuálaláhkarihkkumiin maid dus sáhttá leat geatnegasvuohta hehttet. Plikt.no lea oaivvilduvvon leat veahkkin dutnje gii sáhtát gártat dakkár dillái go jurddašat lea go dus geatnegasvuohta hehttet veahkaválddi dahje illasteami.