Plikt.no birra

Našuvnnalaš máhttoguovddáš veahkaválddi ja traumáhtalaš streassa birra, NKVTS, lea dinutvei.no bokte, Justiisa- ja gearggusvuođadepartemeantta ovddas ráhkadan old.plikt.no. Neahttasiidu galgá veahkkin loktet dihtomielalašvuođa hehttengeatnegasvuođa birra veahkaválddálaš- ja seksuálaláhkarihkkumiid oktavuođas. Plikt.no almmuhuvvui 2019:s ja lea oassi doaibmabidjopáhkas mii čuovvu doaibmaplána veahkaválddi vuostá lagas oktavuođain, (2014-2017), Et liv uten vold.

Geatnegasvuohta hehttet veahkaválddi ja illastemiid

Mis lea buohkain geatnegasvuohta geahččalit hehttet ahte muhtun gillá duođalaš rihkolaš daguid, dakkár daguid mat čuhcet dearvvašvuhtii dahje leat heaggavárálaččat. Hehttengeatnegasvuohta gusto buohkaide, sihke ámmátolbmuide geain lea jávohisvuođageasku, ja priváhtaolbmuide.

Hehttengeatnegasvuođa birra eai dieđe nu oallugat. Mánáid-, nuoraid- ja bearašdirektoráhta čađahii guorahallama 2018:s mii čájehii ahte 74 proseantta mis ii lean gullan ge dan birra. Dušše 1 bargi 10 bargis dearvvašvuođadoaimmahagas, skuvllain, mánáidgárddiid, SAÁO dahje friddjaáiggeservviid dihte hehttengeatnegasvuođa birra ja maid dat mielddisbuktá.

Hehttengeatnegasvuohta lea erenoamáš áigeguovdil ámmátjoavkkuide mat deaivvadit olbmuiguin barggus, ja geat sáhttet šaddat dakkár diliide gos fertejit árvvoštallat lea go sis geatnegasvuohta geahččalit hehttet illasteami dahje roavva veahkaválddi. Go olbmot dihtet nu unnán hehttengeatnegasvuođa birra, dahje iešguđetládje dulkojit dahje praktiserejit dan, de dat sáhttá dagahit dan ahte gillájeaddjit geat vásihit veahkaválddi ja illastemiid, eai oaččo veahki nohkka jođánit. Dat sáhttá maid dagahit váttisvuođaid iešguđetlágan fágaolbmuid ja ámmátjoavkkuid ovttasbargui.

Plikt.no:s gávnnat dieđuid hehttengeatnegasvuođa birra ja movt sáhtát ovttas gillájeddjiin hehttet. Gávnnat maid makkár veahkaválddálaš- ja seksuálaláhkarihkkumiid dus sáhttá leat geatnegasvuohta hehttet. Plikt.no lea oaivvilduvvon leat veahkkin dutnje gii sáhtát gártat dakkár dillái go jurddašat lea go dus geatnegasvuohta hehttet veahkaválddi dahje illasteami.

Olu giitu buohkaide geat ipmárdusanalysaid, čoahkkimiid, telefovdnaságastallamiid ja e-boasttaid bokte leat buktán dehálaš cealkámušaid old.plikt.no-ráhkadeami oktavuođas, ja go árvasit lehpet juogadan iežadet máhtu, vásáhusaid ja jurdagiid minguin.